↩
EDidit Aroensis specimen laudabile qvondam
Divini ingenii, Psaltica Sacra canens.
Hoc tyrocinium placet omnibus: anne placebit
Qvod limatius est, eximiumque, magis?
Sex canit Aroensis primorum facta dierum;
Dum canit, Hexametrum fabricat ille novum.
Materies condigna metro, metrumque; novellum
Materiâ dignum! Dania digna viro!
Hinc doleo ereptum tibi, Patria pulchra, Poëtam;
Qvi docuit modulis versificare novis.
Huc ades ô Bartas, Itali procedite Vates,
Huc vos Collegæ Teutones ite simul.
Rhythmus vos celebrat, Vates, heroicus omnes,
Pes at Jambus erit, sive Trochæus erit.
Dactylicis rhythmis vestra est & Musa superba,
Qvæ tamen ignorat carminis hocce genus.
Aroense hoc nostro duce', discat garrula vestra
Hexametrum posthac pangere Musa novum.
Octo lustra ferè sunt, cum Maro ludere nostras
Cæpit; Teutonicus cæpit & inde chorus.
Perpetuò Aroensem celebrabit Danica lingva;
Et sua fructiferum laus manet æqva chorum.
Aroensis senior qvod fudit & abdidit olim,
Junior Aroensis luce poëma beat.