VI.
✂
Strǽt wæs stán-fáh,
stíg wísode
gumum æt-gædere,
gúð-byrne scán,
heard hond-locen,
hring-íren scír
song in searwum,
þá híe tó sele furðum,
in hyra gryre-geatwum,
gangan cwómon.
Setton sǽ-méðe
síde scyldas,
rondas regn-hearde,
wið þæs recedes weal;
bugon þá tó bence,
byrnan hringdon,
gúð-searo gumena,
gáras stódon,
sǽ-manna searo,
samod ætgædere,
12æsc-holt ufan grǽg;
wæs se íren-þreát
wǽpnum ge-wurðad.
Þá þǽr wlonc hæleð,
oret-mecga,*oret-mecgas. M.
æfter hæleðum frægn:
“Hwanon ferigeað ge
fætte scyldas,
grǽge syrcan
and grím-helmas,
here-sceafta heáp?
Ic eom Hróðgáres
ár and ombiht,
ne seah ic elþeódige
þus manige men
módiglícran:
wén ic þæt ge for wlenco,
nalles for wrǽc-síðum,
ac for hige-þrymmum,*þrymmum. A. B.
Hróðgár sóhton.”
Him þá ellen-róf
andswarode,
wlanc Wedera leód,
word æfter spræc,
heard under helme:
“We synt Higeláces
beód-geneátas,
Beówulf is mín nama;
wille ic á-secgan
suna Healfdenes,*sunu. M.
mǽrum þeódne,
mín ǽrende,
aldre þínum,
gif he us ge-unnan wile
þæt we hine swá gódne
grétan móton.”
Wulfgár maðelode
(þæt wæs Wendla leód,
wæs his mód-sefa
manegum gecýðed,
wíg and wísdóm):
“Ic þæs wine Deniga,
freán Scildinga,
frinan wille,
beága bryttan,
swá þú béna eart,
þeóden mǽrne,
ymb þínne síð,
and þe þá andsware
ædre gecýðan,
þe me se góda
á-gifan þenceð.”
Hwearf þá hrædlíce,
þǽr Hróðgár sæt,
eald and unhár,
mid his eorla gedriht;
eode ellen-róf,
þæt he for eaxlum gestód
Deniga freán,
cúðe he duguðe þeáw;
Wulfgár maðelode
tó his wine-drihtne:
“Her syndon geferede,*geferede. A. B.
feorran cumene,
13ofer geofenes be-gang,
Geáta leóde,
þone yldestan
oret-mecgas
Beówulf nemnað;
hý bénan synt,
þæt híe þeóden mín
wið þe móton
wordum wrixlan;
nó þú him wearne geteoh
þínra gegn-cwida
glæd-man Hróðgár!*glæd-mód. G.
hý on wíg-getawum
wyrðe þinceað
eorla ge-æhtlan,
húru se aldor deáh,
se þǽm heaðo-rincum
hider wísade.”